GJINKALLA DHE BLETA

GJINKALLA DHE BLETA

Fabula nga MEVLUD BUCI

TRADHTI

Kur fitoi votëbesimin

Menjëherë mori frenat,

Dhe me fjalë e përbetime

Në shesh bënte rrenat.

Hiqej e ashpër dhe e larë

Merrej fshehtas me zagarë.

Me të mëdhenj hamshorë,

Jo me burrin me dashnorë.

E tha bilbili me të kënduar:
Buçat dinë veç me tradhtuar…

URATË

Zihen sita me shoshën

Kush ka meritën e kush lëmoshën,

Jam e hollë,përgjigjet sita,

I thotë shosha:unë kam merita.

Urata ngroh si rrezet e diellit:

Lum kush kalon sitën e miellit..

BOSI DHE HALLEXHIU

Hiqej kryeneç e kolos

Në një firmë një kryebos,

S`dinte si ushqehet miu,

S`dëgjonte qarje hallexhiu,

I dukej vetja zoti vetë,

Në harrim, si bien rrufetë,

Sapo qielli lart vetëtiu,

Hallexhiut vuajtja i sosi;

Nga rrufeja e pësoi bosi…

ZOTËSI

Në livadhe tek një shesh

Na u grindën dy desh,

Folën delet me të mirë:

Ne s`ju ndajmë ,s`kemi brirë,

Pra tufës deshët thanë:

Këto brirë në krye na mbajnë,

Delet kullosin qetë kurorën

Deshtë prijnë,tundin këmborën…

DY LEJLEKËT DHE SORRA

Qeshin fort dy lejlekët

sesi sorra heq brekët,

Ajo ish ngjitur në pozitë,

Ligjëronte natë e ditë.

Bëjmë çudi,thanë lejlekët

Mburret sorra se heq brekët,

Vërtet kemi të gjata shalët

Por kudo i peshojmë fjalët.

Sorra e zezë,zikatrane,

Ngjitet lart si politikane,

I thanë kafshët e pylltarisë:

Të rrofshin mesazhet e dashurisë…

ÇMIMI

Doli në skenë shalështruar

Dhe e zhveshur gjysmë e lart,

Hidhej,përdridhej e hutuar,

Mburrej se bënte sfilatë.

E shikonin me nënqeshje

Po habitej një kërriç,

Ç`ne moderne, kaq e zhveshur,

By…shtruar e lakuriq.

S`e ka keq krriç i gomarit

E tha cjapi pa ngurrim

Botë e hurit dhe litarit

Të përdalës i jep çmim…

VLERË

Në kodër të mbushur me tërfil

Nisi këngën një bilbil,

Poshtë vjeshtonte ky veshgjati

Duke pallur sa u tund fshat.

Me jehona u mbush zalli

Ulërin ujku e çakalli,

Blegërinë kecat e dhitë

Nisën shpezët meloditë.

Ky ,tha delja, është evenimenti,

Të zotit i flet talenti,

O bilbil të ka hije kënga

Të gjithëve u këndoftë zemra…

MERITË

Thoshte një peshk liqeni

Jam i lirë,notoj i qetë,

Mengadalë,i foli qeni,

Han karrem e bie në grep.

Foli tutje peshkatari,

Ka mirësi e dhimbje në jetë,

Kush ka shpirtin si behari

gëzon lumturinë e vërtetë.

S`harrohet urtësi e të vjetrit:

Lum kush i jep meritën tjetrit…

SHPIKJE

Ç`ndodh kështu,pyeti një dhi

Bëhen gënjeshtra e hajdutëri

Është e qartë, thotë një gomar

Të gjithë vjedhin, dalin të larë.

Ndaj moj dhi t`mos kesh siklete

Qeveria vjedh për vete,

Kur vjedh dashi me këmborë

Të tjerë bëjnë kërdinë

Mbushet thesi pasuror

Për të fshehur mjeshtërinë.

Vërtet mua më thonë gomar

Mbaj n`kurriz,ju mirë e dini

Vodhën të mëdhenjtë pushtetarë,

Mua më mbet “hajdut florini”…

BESNIKËRI

E vërtetë,e saktë e plot

Kam një qen që derdh lot.

Lëshon zërin me jehonë

Sa herë shikon të zonë..

E tund bishtin sikur qesh

ngrihet hopa mu në shesh

Leh e ngrihet në këmbë

Kë nuk njeh shqyen me dhëmbë.

Për atë që e ushqen

S`ka më të dashur  ky qen,

E ka bekuar i madhi zot,

Sa më sheh, ai derdh lot.

Si ky qen t`i kesh vërtetë

Të shiturit depulantetë,

Do të kishim lumturi

 Si ky të kishin besnikëri…

PËSIM

I tha bilbili shqiponjës

Si të ruhemi prej Kalit të Trojës

Këshilloi zebra tek tenda

Ruaju të keqes përbrenda.

E di tash çdo kafshë e malit

Si është histori e Kalit,

Përsërit zog i shqiponjës

Ruajuni prej Kalit të Trojës,

Prej të ligut prit belanë

Kali i Trojës të merr kalanë…

GJINKALLA DHE BLETA

Një gjinkallë diku në shesh

Bletën fillon e përqesh

Ç`ne ,i tha, që bredh në pyje

Unë bëj qejf ,këndoj në hije.

Mirë,tha bleta,ti je e rralla

Ndaj ta thonë emrin gjinkalla,

Pa dëgjo një herë bletën

Unë në punë e kaloj jetën…

Në acar u gajas mëhalla,

Kur në strofka qante gjinkalla,

E mësuam të gjithë në troje

Bleta mjaltë hante në hoje..

Pra,e dëshmoi e vërteta

Lum kush punon si bleta,

S`kalohet jeta me andralla

Boshët janë si gjinkalla…

DREDHI

Cjap i tufës e tha hapur

Përse vallë s`na pyet dhia,

Don postet me i kapur

Të kryesojë tek partia.

Me të qeshur e tha dhia

Jam e zoja ,këtë e di,

Na i doli sheshit dredhia

U kap mat në dashuri.

Cjap syleshi-zog gomari,

E ka fajin-tha- celulari…

EDUKIM

Tek një pyll nën gëmushë

Mblodhi klyshët një arushë,

Tek bari ,pyet miu,

Ç`u mëson bijve ariu.

Përmatanë ndër livadhe

E tha fjalën një kunadhe

Huqet ua mëson nëna

Të hanë mjaltë edhe thana.

Kot s`i thonë,tha kocomiu

Të fortë si këlysh ariu…

KUVEND

Ngrihet dhelpra bën lëvdatë

Sulmon ujkun e ngratë

Pas gërthet korbziu

Hungërin me forcë ariu.

Dhe një lopë fort pëllet

Flet për ligjet një lanet

Një çakeshë hiqet manare

Si e urtë kjo tinzare

Vetlëvdata bën ky derri

I fryn zjarrit e plas sherri,

Bilbilat bëjnë sehir

Për kuvendin me vampirë

Qeshën me të madhe gomarët

Bëjnë kuvend parlamentarët

Qielli prêt dritë e shpresë

Bëjnë kuvend si arrat në thes…

POZITË

Çakalli në krye të qeverisë

Na i mburrej dhisë,

Unë kam shumë vlerë

Në krye do të rri përherë.

I thanë kafshët, do larguar

Kur lëviz del ujë i kulluar.

E tha delja,dhija kali,

Nga ujë i ndenjur bëhet moçali..

DËSHTIM

Gurrës një herë i tha stina

Edhe vapa s`të shëroi,

I tha gurra  vadis lëndina

Pa mua s`është as përroi.

Dëgjoi përroi e u harbua

E përmbys,tha, dhe shkurren

I bëj dallgët sa të dua,

Nuk kam nevojë për gurrën..

I tha i mençuri, ta njoh lëkurën

Than ,përrua, kur harron gurrën..

DEBAT

Një herë topi rrumbullak

Iu mburr shkopit të gjatë

Unë meritoj tortën

Kur hyj trondis portën…

Shkop i gjatë tha t ë drejtën

Unë o top e çaj rrjetën,

Ty kot s`të thonë top,

Mendjelehtët duan shkop.

Unë tha topi kam vizion

Gjuajtësi i mirë me mua shënon..

DIFERENCË

Futet mëllmnja në dëllinjë

Me romuze si ia do huqi

Shpejt ia prishi vetminë

Mbi çati një zog gushkuqi…

Tha mëllenja:Jam e artë

Paçka se rri në ferra,

Përshtat më vijnë lisat e gjatë

Aty më shijon pranvera…

Tha gushkuqi:S`mund të jemi shokë,

Unë në lartësi e ti përtokë…

MENDJELEHTËSI

Kaloi lepuri ndër ograjë

Hënëza doli në thepajë

Dhe me vrap në një shkrep

U tremb lepuri nga hija e vet.

Seç i tha një zog i mbetur

Vrapon kot se të thonë lepur..

GRINDJE

Njëri hidh e tjetri prit

Llomotisin në tribunë

Edhe macet janë habit

Nga të sharat det e lumë.

Hidhet flet luanziu

Do të hamë peshq të mëdhenj

Nëpër vrima seç qesh miu

Mos na bëni budallenj.

Kau i urtë e tha me bindje

Shtëpia e varfër ka veç grindje…

KORRUPSION

Seç u grindën dy gjitona

Bre,janë avionë a mushkonja

Prova ndau iluzionin

Kur të rrëzuar,panë avionin.

Supermanjati i partive

U hidhte njerëzve hi syve

Hipokriti,sinonim i drogës

Mushkonja quante avionët e drogës.

FUND

Në monopat foli një gogël

Pilaf i madh do lulën e vogël

Mos i quani të tjerët budallenj

Kur thoni se hamë veç peshq të mëdhenj.

Matni llafet,hani të mëdha llokmat

Na bëfshin mirë veç cironkat…